nala-e-jaan-gudaz ne mara

nāla-e-jāñ-gudāz ne maarā

soz-e-ulfat ke saaz ne maarā

ye kahā paḌh ke merā nāma-e-shauq

us sarāpā niyāz ne maarā

muñh se uff bhī to kar nahīñ sakte

ḳhauf-e-ifshā-e-rāz ne maarā

zindagī chain se guzartī thī

chashm-e-nazzāra-bāz ne maarā

daad bhī shauq-e-dīd kī na milī

jalva-e-be-niyāz ne maarā

maut kī zad se bach gayā jo koī

us ko umr-e-darāz ne maarā

uñgliyāñ har taraf se uThtī haiñ

turra-e-imtiyāz ne maarā

koī dam-sāz koī hai jāñ-bāz

aap ke sāz-bāz ne maarā

jis ke qabze meñ hai masīhā.ī

ham ko is teġh-e-nāz ne maarā

kyā bharosa kisī pe ho ai 'josh'

dil ko ik dil-navāz ne maarā

nala-e-jaan-gudaz ne mara

soz-e-ulfat ke saz ne mara

ye kaha paDh ke mera nama-e-shauq

us sarapa niyaz ne mara

munh se uff bhi to kar nahin sakte

KHauf-e-ifsha-e-raaz ne mara

zindagi chain se guzarti thi

chashm-e-nazzara-baz ne mara

dad bhi shauq-e-did ki na mili

jalwa-e-be-niyaz ne mara

maut ki zad se bach gaya jo koi

us ko umr-e-daraaz ne mara

ungliyan har taraf se uThti hain

turra-e-imtiyaz ne mara

koi dam-saz koi hai jaan-baz

aap ke saz-baz ne mara

jis ke qabze mein hai masihai

hum ko is tegh-e-naz ne mara

kya bharosa kisi pe ho ai 'josh'

dil ko ek dil-nawaz ne mara