nala-e-mauzun se misra aah ka chaspan hua

nāla-e-mauzūñ se misra.a aah kā chaspāñ huā

zor ye pur-dard apnā matl.a-e-dīvāñ huā

jis ne dekhā aa ke ye ā.īna-ḳhāna dahr kā

fil-haqīqat bas vo apnā aap hī hairāñ huā

sab pe zāhir ho ga.ī betābi-e-dil shakl-e-barq

vo bhabhūkā apnī nazroñ se jo Tuk pinhāñ huā

us ke jaane se ye dil meñ aa.e hai rah rah ke haa.e

sab jahāñ bastā hai ik apnā hī ghar vīrāñ huā

kaash dil se chashm tak aane na paatā tifl-e-ashk

rafta rafta ab to ye laḌkā koī tūfāñ huā

gar hue vā us ke lab to dekhiye kyā gul khile

ho ḳhafā jab be-tarah vo raunaq-e-bustāñ huā

aa.e jo marqad pe mere so mukaddar ho ga.e

ḳhaak ho kar bhī ġhubār-e-ḳhātir-e-yārāñ huā

roz-o-shab rahne lage is ghar meñ ye kāfir sanam

ka.aba-e-dil saaf apnā ab to kufristāñ huā

josh-e-vahshat dekhiyo koī ki har ik ḳhaar ke

dhajjiyāñ ho kar gale kā haar ye dāmāñ huā

ashk-e-rañgīñ ne jo apne kar diyā yaañ farsh-e-gul

rashk-e-sad-gulshan hameñ ye gosha-e-zindāñ huā

bañdh gayā terā tasavvur jis kī āñkhoñ ke huzūr

us ko bas aalam visāl-o-hijr kā yaksāñ huā

yak-ba-yak tū ne ye kaisā rañg badlā ai falak

terī gardish se kahīñ kyā saḳht jī halkāñ huā

kal talak jo ghar ghar apnā thā so us ke dar pe aaj

niilā piilā dekh kar kyā kyā hameñ darbāñ huā

garche har qālib meñ 'jur.at' sūrateñ Dhaltī rahīñ

par banā jo dard kā putlā vo hī insāñ huā

nala-e-mauzun se misra aah ka chaspan hua

zor ye pur-dard apna matla-e-diwan hua

jis ne dekha aa ke ye aaina-KHana dahr ka

fil-haqiqat bas wo apna aap hi hairan hua

sab pe zahir ho gai betabi-e-dil shakl-e-barq

wo bhabhuka apni nazron se jo Tuk pinhan hua

us ke jaane se ye dil mein aae hai rah rah ke hae

sab jahan basta hai ek apna hi ghar viran hua

kash dil se chashm tak aane na pata tifl-e-ashk

rafta rafta ab to ye laDka koi tufan hua

gar hue wa us ke lab to dekhiye kya gul khile

ho KHafa jab be-tarah wo raunaq-e-bustan hua

aae jo marqad pe mere so mukaddar ho gae

KHak ho kar bhi ghubar-e-KHatir-e-yaran hua

roz-o-shab rahne lage is ghar mein ye kafir sanam

kaba-e-dil saf apna ab to kufristan hua

josh-e-wahshat dekhiyo koi ki har ek KHar ke

dhajjiyan ho kar gale ka haar ye daman hua

ashk-e-rangin ne jo apne kar diya yan farsh-e-gul

rashk-e-sad-gulshan hamein ye gosha-e-zindan hua

bandh gaya tera tasawwur jis ki aankhon ke huzur

us ko bas aalam visal-o-hijr ka yaksan hua

yak-ba-yak tu ne ye kaisa rang badla ai falak

teri gardish se kahin kya saKHt ji halkan hua

kal talak jo ghar ghar apna tha so us ke dar pe aaj

nila pila dekh kar kya kya hamein darban hua

garche har qalib mein 'jurat' suraten Dhalti rahin

par bana jo dard ka putla wo hi insan hua