nala-e-shabana bhi aah-e-subh-gahi bhi

nāla-e-shabāna bhī āh-e-sub.h-gāhī bhī

kyā hayāt-sāmāñ hai ġham kī be-panāhī bhī

ham junūñ-shi.āroñ meñ aate aate aatī hai

shān-e-be-niyāzī bhī ān-e-kaj-kulāhī bhī

ishq ne atā kar ke jazb-o-shauq-e-be-pāyāñ

musht-e-ḳhāk ko baḳhshī āsmāñ-panāhī bhī

jalva-e-bahārāñ meñ rang bhar ga.ī āḳhir

kitnī kaam kī niklī apnī ḳhush-nigāhī bhī

dil kī ḳhasta-hālī phir dil kī ḳhasta-hālī hai

ishq meñ gavārā hai jaan kī tabāhī bhī

koī aise qātil ko kis tarah kahe qātil

jis kī aañkh se jhalke rang-e-ḳhair-ḳhvāhī bhī

hashr-e-kārvāñ kyā ho kuchh kahā nahīñ jaatā

nā-shanās-e-manzil haiñ rahnumā bhī raahī bhī

azm-e-be-nihāyat kī āb-o-tāb se 'manshā'

duur ho ke rahtī hai baḳht kī siyāhī bhī

nala-e-shabana bhi aah-e-subh-gahi bhi

kya hayat-saman hai gham ki be-panahi bhi

hum junun-shiaron mein aate aate aati hai

shan-e-be-niyazi bhi aan-e-kaj-kulahi bhi

ishq ne ata kar ke jazb-o-shauq-e-be-payan

musht-e-KHak ko baKHshi aasman-panahi bhi

jalwa-e-bahaaran mein rang bhar gai aaKHir

kitni kaam ki nikli apni KHush-nigahi bhi

dil ki KHasta-haali phir dil ki KHasta-haali hai

ishq mein gawara hai jaan ki tabahi bhi

koi aise qatil ko kis tarah kahe qatil

jis ki aankh se jhalke rang-e-KHair-KHwahi bhi

hashr-e-karwan kya ho kuchh kaha nahin jata

na-shanas-e-manzil hain rahnuma bhi rahi bhi

azm-e-be-nihayat ki aab-o-tab se 'mansha'

dur ho ke rahti hai baKHt ki siyahi bhi