nalon se mere kab tah-o-baala jahan nahin

nāloñ se mere kab tah-o-bālā jahāñ nahīñ

kab āsmāñ zamīn-o-zamīñ āsmāñ nahīñ

qātil kī chashm-e-tar na ho ye zabt-e-āh dekh

juuñ sham.a sar kaTe pe uThā yaañ dhuāñ nahīñ

ai bulbulān-e-sho.ala-dam ik naala aur bhī

gum-karda-rāh-e-bāġh huuñ yaad āshiyāñ nahīñ

is bazm meñ nahīñ koī āgāh varna kab

vaañ ḳhanda zer-e-lab udhar ashk-e-nihāñ nahīñ

ai dil tamām naf.a hai saudā-e-ishq meñ

ik jaan kā ziyāñ hai so aisā ziyāñ nahīñ

nāz-o-nigah ravish sabhī laagū haiñ jaan ke

hai kaun adā vo terī ki jo jāñ-sitāñ nahīñ

milnā tirā ye ġhair se ho bahr-e-maslahat

ham ko to sādgī se tirī ye gumāñ nahīñ

āzurda tak bhī kuchh na hai us ke rū-ba-rū

maanā ki aap sā koī jādū-bayāñ nahīñ

nalon se mere kab tah-o-baala jahan nahin

kab aasman zamin-o-zamin aasman nahin

qatil ki chashm-e-tar na ho ye zabt-e-ah dekh

jun shama sar kaTe pe uTha yan dhuan nahin

ai bulbulan-e-shoala-dam ek nala aur bhi

gum-karda-rah-e-bagh hun yaad aashiyan nahin

is bazm mein nahin koi aagah warna kab

wan KHanda zer-e-lab udhar ashk-e-nihan nahin

ai dil tamam nafa hai sauda-e-ishq mein

ek jaan ka ziyan hai so aisa ziyan nahin

naz-o-nigah rawish sabhi lagu hain jaan ke

hai kaun ada wo teri ki jo jaan-sitan nahin

milna tera ye ghair se ho bahr-e-maslahat

hum ko to sadgi se teri ye guman nahin

aazurda tak bhi kuchh na hai us ke ru-ba-ru

mana ki aap sa koi jadu-bayan nahin