nam-e-wafa pe de ke jaan dil ne wafa KHarid li

nām-e-vafā pe de ke jaan dil ne vafā ḳharīd lī

thī bhī ḳharīdne kī chiiz ḳhuub kiyā ḳharīd lī

hasb-e-mazāq o hasb-e-shauq ek ik adā ḳharīd lī

us ne jafā.eñ mol liiñ maiñ ne vafā ḳharīd lī

zabt kā dil meñ kar ke ahd un se baḌhāyā mel-jol

dard se pahle dard kī ham ne davā ḳharīd lī

ahd-e-shabāb thā bahār aur sajā bahār ko

jitnī jahāñ meñ mil sakī is ne hayā ḳharīd lī

zarf se baḌh ke ne.amat-e-ishq bhī maut ban ga.ī

ham ne bhī to ġhazab kiyā had se sivā ḳharīd lī

ishq kī kār-gāh se husn kī bārgāh se

jis ko na aur kuchh milā is ne qazā ḳharīd lī

dete dilāte be-talab toḌ ke haath rakh diye

tere karam ne tāqat-e-dast-e-duā ḳharīd lī

aaj nasīb-e-dushmanāñ chehra hai kyuuñ udaas udaas

merī tarah balā-e-ishq tum ne bhī kyā ḳharīd lī

'manzar' unheñ dikhā ke zahr kah rahā hai ḳhushī ḳhushī

liije davā le aa.e mol liije shifā ḳharīd lī

nam-e-wafa pe de ke jaan dil ne wafa KHarid li

thi bhi KHaridne ki chiz KHub kiya KHarid li

hasb-e-mazaq o hasb-e-shauq ek ek ada KHarid li

us ne jafaen mol lin main ne wafa KHarid li

zabt ka dil mein kar ke ahd un se baDhaya mel-jol

dard se pahle dard ki hum ne dawa KHarid li

ahd-e-shabab tha bahaar aur saja bahaar ko

jitni jahan mein mil saki is ne haya KHarid li

zarf se baDh ke neamat-e-ishq bhi maut ban gai

hum ne bhi to ghazab kiya had se siwa KHarid li

ishq ki kar-gah se husn ki bargah se

jis ko na aur kuchh mila is ne qaza KHarid li

dete dilate be-talab toD ke hath rakh diye

tere karam ne taqat-e-dast-e-dua KHarid li

aaj nasib-e-dushmanan chehra hai kyun udas udas

meri tarah bala-e-ishq tum ne bhi kya KHarid li

'manzar' unhen dikha ke zahr kah raha hai KHushi KHushi

lije dawa le aae mol lije shifa KHarid li