nam is allah ke bande ka bhi ruswai mein hai

naam is allāh ke bande kā bhī rusvā.ī meñ hai

jo samundar kī tarah se apnī gahrā.ī meñ hai

shāḳh se patta bhī uḌtā hai parinde kī tarah

zindagī kī koī chingārī tamannā.ī meñ hai

dhuup kā dariyā umaD aatā hai jab chaḌhtā hai din

koī aisī lahr kyā us kī bhī añgḌā.ī meñ hai

jab havāoñ meñ aḌegā sab pata lag jā.egā

jhiil niile āsmāñ kī kitnī gahrā.ī meñ hai

chhoḌ jaatī hai havā bhī naqsh apne ḳhaak par

sochtā huuñ tū kahāñ par jalva-ārā.ī meñ hai

Duub jaate haiñ manāzir Dūbte sūraj ke saath

sach kahā kartā thā vo bhaa.ī kī jaañ bhaa.ī meñ hai

lahlahātī ḳhaak ko dekhā to kyā dekhā miyāñ

us ko dekhā chāhiye jo us kī rā'nā.ī meñ hai

koī darvāze kī dastak kaan meñ paḌtī nahīñ

but banā baiThā huuñ ghar meñ dhyān shahnā.ī meñ hai

ghere rahtā hai mujhe logoñ kī āvāzoñ kā shor

vo akelā dekh kar kahte haiñ tanhā.ī meñ hai

uḌte tayyāre kī khiḌkī se zarā sā jhāñk le

itne hañgāmoñ-bharī duniyā bhī tanhā.ī meñ hai

ham kisī shīshe ko apne muñh se patthar kyuuñ kaheñ

jis kā jo kirdār hai vo us kī goyā.ī meñ hai

dosto kyā pūchhte ho haal is ke gaañv kā

aa.ina lipTā huā tālāb kī kaa.ī meñ hai

uTh rahī thiiñ duur tak paanī kī dīvāreñ 'ḳhalīl'

ham ye samjhe naqs koī apnī bīnā.ī meñ hai

nam is allah ke bande ka bhi ruswai mein hai

jo samundar ki tarah se apni gahrai mein hai

shaKH se patta bhi uDta hai parinde ki tarah

zindagi ki koi chingari tamannai mein hai

dhup ka dariya umaD aata hai jab chaDhta hai din

koi aisi lahr kya us ki bhi angDai mein hai

jab hawaon mein aDega sab pata lag jaega

jhil nile aasman ki kitni gahrai mein hai

chhoD jati hai hawa bhi naqsh apne KHak par

sochta hun tu kahan par jalwa-arai mein hai

Dub jate hain manazir Dubte suraj ke sath

sach kaha karta tha wo bhai ki jaan bhai mein hai

lahlahati KHak ko dekha to kya dekha miyan

us ko dekha chahiye jo us ki ra'nai mein hai

koi darwaze ki dastak kan mein paDti nahin

but bana baiTha hun ghar mein dhyan shahnai mein hai

ghere rahta hai mujhe logon ki aawazon ka shor

wo akela dekh kar kahte hain tanhai mein hai

uDte tayyare ki khiDki se zara sa jhank le

itne hangamon-bhari duniya bhi tanhai mein hai

hum kisi shishe ko apne munh se patthar kyun kahen

jis ka jo kirdar hai wo us ki goyai mein hai

dosto kya puchhte ho haal is ke ganw ka

aaina lipTa hua talab ki kai mein hai

uTh rahi thin dur tak pani ki diwaren 'KHalil'

hum ye samjhe naqs koi apni binai mein hai