نام سو بار ترا میں نے لکھا پانی پر

نام سو بار ترا میں نے لکھا پانی پر

سنگ دل موجوں نے رہنے نہ دیا پانی پر

خون ناحق سے اتر جائے گا وہ بھی قاتل

ناز کرتی ہے بہت تیغ جفا پانی پر

ڈوب جانا تھا محبت کے سمندر میں جسے

اس نے بے خوف و خطر رقص کیا پانی پر

اب نہ ساحل کی تمنا ہے نہ گرداب کا ڈر

چل پڑی کشتیٔ تسلیم و رضا پانی پر

آج پھر سوکھے ہوئے کھیت رہیں گے پیاسے

رخ بتاتا ہے کہ برسے گی گھٹا پانی پر

کھیل بچوں کا نہیں ہوتی محبت اے دل

ناؤ کاغذ کی کہاں لے کے چلا پانی پر

اتحاد آج عناصر میں ہے لیکن کب تک

خاک و آتش پہ بھروسا نہ ہوا پانی پر

عکس ان کا ہے نہ آنسو ہیں وہاں میرے شفیقؔ

ڈھونڈھتی پھرتی ہے کیا موج بھلا پانی پر