nam wale hain na ye zaKHm nishan wale hain

naam vaale haiñ na ye zaḳhm nishāñ vaale haiñ

ham nibāheñge ki ham log zabāñ vaale haiñ

ab jo ghar in pe girā hai to khule haiñ varna

ye makīñ lagtā nahīñ thā ki makāñ vaale haiñ

Thiik guzre nahīñ bāzār se shāyad ham log

ye jo chhīñTe haiñ ye sab sūd-o-ziyāñ vaale haiñ

itnī āsānī pareshān bhī kar saktī hai

ham yaqīñ vaale haiñ sāhab na gumāñ vaale haiñ

ham agar ruk ga.e duniyā to kahāñ sañbhleñge

hameñ jaane de ki ham bār-e-garāñ vaale haiñ

vo zamāna-badarī hijr meñ dekhī hai ki bas

ham samajhte the ki ham kaun-o-makāñ vaale haiñ

dekhne vaale hamāre bhī koī ḳhush to nahīñ

ham vo jhoñke haiñ jo ḳhāk-e-guzarāñ vaale haiñ

nam wale hain na ye zaKHm nishan wale hain

hum nibahenge ki hum log zaban wale hain

ab jo ghar in pe gira hai to khule hain warna

ye makin lagta nahin tha ki makan wale hain

Thik guzre nahin bazar se shayad hum log

ye jo chhinTe hain ye sab sud-o-ziyan wale hain

itni aasani pareshan bhi kar sakti hai

hum yaqin wale hain sahab na guman wale hain

hum agar ruk gae duniya to kahan sanbhlenge

hamein jaane de ki hum bar-e-garan wale hain

wo zamana-badari hijr mein dekhi hai ki bas

hum samajhte the ki hum kaun-o-makan wale hain

dekhne wale hamare bhi koi KHush to nahin

hum wo jhonke hain jo KHak-e-guzaran wale hain