نامہ بر خط دے مجھے اس سے تجھے کیا کام ہے

نامہ بر خط دے مجھے اس سے تجھے کیا کام ہے

ہے نوید زندگی یا موت کا پیغام ہے

دل میں ہے یاد بتاں لب پر خدا کا نام ہے

کہنے سننے کو فقط مذہب مرا اسلام ہے

جیتے جی مجھ کو ملا کچھ بھی نہ لطف زندگی

کشتۂ صد آرزو میرا دل ناکام ہے

آنکھ بھی وہ تو نے دی جو عمر بھر روتی رہی

دل بھی تو نے وہ دیا جو کشتۂ آلام ہے

کیوں مرے بالیں پہ بیٹھے رو رہے ہیں وو سدا

کس طرح میں ان سے کہہ دوں اب مجھے آرام ہے

ہجر میں فاضلؔ کہاں تک روز مر مر کے جیوں

زندگی تو زندگی اب موت بھی بدنام ہے