nama-bar KHat de mujhe is se tujhe kya kaam hai

nāma-bar ḳhat de mujhe is se tujhe kyā kaam hai

hai naved-e-zindagī yā maut kā paiġhām hai

dil meñ hai yād-e-butāñ lab par ḳhudā kā naam hai

kahne sunñe ko faqat maz.hab mirā islām hai

jiite jī mujh ko milā kuchh bhī na lutf-e-zindagī

kushta-e-sad-ārzū merā dil-e-nākām hai

aañkh bhī vo tū ne dī jo umr bhar rotī rahī

dil bhī tū ne vo diyā jo kushta-e-ālām hai

kyoñ mire bālīñ pe baiThe ro rahe haiñ vo sadā

kis tarah maiñ un se kah duuñ ab mujhe ārām hai

hijr meñ 'fāzil' kahāñ tak roz mar mar ke jiyūñ

zindagī to zindagī ab maut bhī badnām hai

nama-bar KHat de mujhe is se tujhe kya kaam hai

hai nawed-e-zindagi ya maut ka paigham hai

dil mein hai yaad-e-butan lab par KHuda ka nam hai

kahne sunne ko faqat mazhab mera islam hai

jite ji mujh ko mila kuchh bhi na lutf-e-zindagi

kushta-e-sad-arzu mera dil-e-nakaam hai

aankh bhi wo tu ne di jo umr bhar roti rahi

dil bhi tu ne wo diya jo kushta-e-alam hai

kyon mere baalin pe baiThe ro rahe hain wo sada

kis tarah main un se kah dun ab mujhe aaram hai

hijr mein 'fazil' kahan tak roz mar mar ke jiyun

zindagi to zindagi ab maut bhi badnam hai