nama dildar tak nahin pahuncha

naama dildār tak nahīñ pahuñchā

hāl-e-dil yaar tak nahīñ pahuñchā

vo bhī me.aar tak nahīñ pahuñchā

sach abhī daar tak nahīñ pahuñchā

phuul kā rang ḳhuub thā lekin

tire ruḳhsār tak nahīñ pahuñchā

us ko taklīf kī ḳhabar kyā ho

paañv jo ḳhaar tak nahīñ pahuñchā

ḳhair guzrī ki aaj qātil kā

haath talvār tak nahīñ pahuñchā

kab mirā kārvāñ zamāne meñ

rāh-e-dushvār tak nahīñ pahuñchā

fikr thī sab ko apne chehroñ kī

koī kirdār tak nahīñ pahuñchā

terī rahmat se be-ḳhabar hī rahā

jo gunah-gār tak nahīñ pahuñchā

dil-e-betāb terā afsāna

nigah-e-yār tak nahīñ pahuñchā

zer-e-dīvār maiñ jahāñ baiThā

saaya dīvār tak nahīñ pahuñchā

nama dildar tak nahin pahuncha

haal-e-dil yar tak nahin pahuncha

wo bhi mear tak nahin pahuncha

sach abhi dar tak nahin pahuncha

phul ka rang KHub tha lekin

tere ruKHsar tak nahin pahuncha

us ko taklif ki KHabar kya ho

panw jo KHar tak nahin pahuncha

KHair guzri ki aaj qatil ka

hath talwar tak nahin pahuncha

kab mera karwan zamane mein

rah-e-dushwar tak nahin pahuncha

fikr thi sab ko apne chehron ki

koi kirdar tak nahin pahuncha

teri rahmat se be-KHabar hi raha

jo gunah-gar tak nahin pahuncha

dil-e-betab tera afsana

nigah-e-yar tak nahin pahuncha

zer-e-diwar main jahan baiTha

saya diwar tak nahin pahuncha