ناموس دوستی کا شناسا نہیں کوئی

ناموس دوستی کا شناسا نہیں کوئی

وہ دور ہے کہ اپنا بھی اپنا نہیں کوئی

چہرے پہ چہرہ ظاہر و باطن میں بھی تضاد

اک سایا سب کے ساتھ ہے تنہا نہیں کوئی

رستے بکھر رہے ہیں کہ وقت زوال ہے

پہلے کی طرح ٹوٹ کے ملتا نہیں کوئی

پردے سے باہر آ کے سروں کا شمار کر

یہ سب مرے عزیز ہیں تیرا نہیں کوئی

تاریکیوں کو چیر کے آتی ہے صبح نو

سورج کی روشنی پہ تو پہرا نہیں کوئی

پرچھائیوں کا رقص تو رہتا ہے آس پاس

اس کے سوا نظر میں سراپا نہیں کوئی