ناموس قلم فکر گہر بار نہ بیچو

ناموس قلم فکر گہر بار نہ بیچو

اے دیدہ ورو غیرت فنکار نہ بیچو

چپ رہنا تو ہے ظلم کی تائید میں شامل

حق بات کہو جرأت اظہار نہ بیچو

ورثہ ہے یہ نبیوں کا امانت ہے خدا کی

جاں ہارنے والو دل خوددار نہ بیچو

کانٹے کبھی ہوتے نہیں پھولوں کے برابر

اے اہل چمن حسن کا معیار نہ بیچو

روشن ہے اسی نور سے قندیل تمنا

افسردہ دلو لذت آزار نہ بیچو

راس آتی نہیں سب کو یہ آوارہ مزاجی

اے دشت نوردو ابھی گھر بار نہ بیچو

اے شعلہ رخو حسن کی پہچان تو رکھو

آنکھوں کی حیا تابش‌ رخسار نہ بیچو

کہنے دو عزیزؔ اس کو جو کہتا ہے زمانہ

تم اپنا لب و لہجۂ اشعار نہ بیچو