namus-e-qalam fikr-e-guhar-bar na becho

nāmūs-e-qalam fikr-e-guhar-bār na becho

ai dīda-varo ġhairat-e-fankār na becho

chup rahnā to hai zulm kī tā.īd meñ shāmil

haq baat kaho jur.at-e-iz.hār na becho

virsa hai ye nabiyoñ kā amānat hai ḳhudā kī

jaañ hārne vaalo dil-e-ḳhuddār na becho

kāñTe kabhī hote nahīñ phūloñ ke barābar

ai ahl-e-chaman husn kā me'yār na becho

raushan hai isī nuur se qindīl-e-tamanna

afsurda-dilo lazzat-e-āzār na becho

raas aatī nahīñ sab ko ye āvāra-mizājī

ai dasht-navardo abhī ghar-bār na becho

ai sho'la-ruḳho husn kī pahchān to rakkho

āñkhoñ kī hayā tābish-e-ruḳhsār na becho

kahne do 'azīz' us ko jo kahtā hai zamāna

tum apnā lab-o-lahja-e-ash'ār na becho

namus-e-qalam fikr-e-guhar-bar na becho

ai dida-waro ghairat-e-fankar na becho

chup rahna to hai zulm ki taid mein shamil

haq baat kaho jurat-e-izhaar na becho

wirsa hai ye nabiyon ka amanat hai KHuda ki

jaan haarne walo dil-e-KHuddar na becho

kanTe kabhi hote nahin phulon ke barabar

ai ahl-e-chaman husn ka me'yar na becho

raushan hai isi nur se qindil-e-tamanna

afsurda-dilo lazzat-e-azar na becho

ras aati nahin sab ko ye aawara-mizaji

ai dasht-nawardo abhi ghar-bar na becho

ai sho'la-ruKHo husn ki pahchan to rakkho

aankhon ki haya tabish-e-ruKHsar na becho

kahne do 'aziz' us ko jo kahta hai zamana

tum apna lab-o-lahja-e-ash'ar na becho