naz hai mashq-e-jafa par us sitam-ijad ko

naaz hai mashq-e-jafā par us sitam-ījād ko

kab karegā shaad merī ḳhātir-e-nāshād ko

kis tarah kā samm-e-qātil hai ye sharbat ishq kā

jān-e-shīrīñ zahr āḳhir ho ga.ī farhād ko

rahm jab kartā nahīñ nāloñ se phir kyā fā.eda

dardmandī bulbul-e-nālāñ se kyā sayyād ko

kaise vo ḳhush-fahm haiñ patthar paḌe us fahm par

jo jahānābād samjhe is ḳharāb-ābād ko

ik ta'alluq se hazāroñ ranj hote haiñ nasīb

fikr karte kis ne dekhā hai kisī āzād ko

jānte haiñ juzv hai īmān kā hubb-e-vatan

be-tarah bhūle vatan haiñ kyā huā ustād ko

nāla-o-zārī meñ ai 'ājiz' tū kyoñ masrūf hai

kaun suntā hai are nādāñ tirī fariyād ko

naz hai mashq-e-jafa par us sitam-ijad ko

kab karega shad meri KHatir-e-nashad ko

kis tarah ka samm-e-qatil hai ye sharbat ishq ka

jaan-e-shirin zahr aaKHir ho gai farhad ko

rahm jab karta nahin nalon se phir kya faeda

dardmandi bulbul-e-nalan se kya sayyaad ko

kaise wo KHush-fahm hain patthar paDe us fahm par

jo jahanabaad samjhe is KHarab-abaad ko

ek ta'alluq se hazaron ranj hote hain nasib

fikr karte kis ne dekha hai kisi aazad ko

jaante hain juzw hai iman ka hubb-e-watan

be-tarah bhule watan hain kya hua ustad ko

nala-o-zari mein ai 'ajiz' tu kyon masruf hai

kaun sunta hai are nadan teri fariyaad ko