naz-o-ada hai tujhse dil-aram ke liye

nāz-o-adā hai tujh se dil-ārām ke liye

ye jaama qat.a hai tire andām ke liye

vahshat meñ kaabe ko jo gayā kū-e-yār se

latte junūñ ne jāma-e-ehrām ke liye

āshiq huuñ har tarah se gunahgār huuñ tirā

hājat qusūr kī nahīñ ilzām ke liye

kyā kyā japegī kaisā raTegī zabāñ use

tasbīh ham ne lī hai tire naam ke liye

tiflī ke girye kā ye khulā haal vaqt-e-marg

āġhāz hī meñ rote the anjām ke liye

achchhā nahīñ muqābla us chashm-e-shoḳh se

ik din shikast-e-fāsh hai bādām ke liye

vo naunihāl aa.e ilāhī murād par

hāsil ho puḳhtagī samar-e-ḳhām ke liye

har-chand apnā nāma-e-isyāñ siyāh ho

hogā safed sub.h hai har shaam ke liye

nāmard aur mard meñ itnā hī farq hai

vo naan ke liye mare ye naam ke liye

misl-e-kamand apnī rasā.ī hui agar

ai qasr-e-yār bose lab-e-bām ke liye

kyā chashm-e-mast-e-yār se tashbīh dījiye

kaifiyyat-e-nigāh nahīñ jaam ke liye

rakhvā ke zulfeñ yaar ne lākhoñ hī murġh-e-dil

paidā kiye haiñ kashmakash-e-dām ke liye

dil meñ sivā.e yaar jagah ho na ġhair kī

ḳhalvat sarā-e-ḳhās nahīñ aam ke liye

jaatā hai bahr-e-ġhusl jo ai ḳhush-dimāġh tū

jaltā hai uud garmī-e-hammām ke liye

'ātish' jo chāhe paa.e tavakkul ke mahkame

jo sub.h ko mile na rahe shaam ke liye

naz-o-ada hai tujh se dil-aram ke liye

ye jama qata hai tere andam ke liye

wahshat mein kabe ko jo gaya ku-e-yar se

latte junun ne jama-e-ehram ke liye

aashiq hun har tarah se gunahgar hun tera

hajat qusur ki nahin ilzam ke liye

kya kya japegi kaisa raTegi zaban use

tasbih hum ne li hai tere nam ke liye

tifli ke girye ka ye khula haal waqt-e-marg

aaghaz hi mein rote the anjam ke liye

achchha nahin muqabla us chashm-e-shoKH se

ek din shikast-e-fash hai baadam ke liye

wo naunihaal aae ilahi murad par

hasil ho puKHtagi samar-e-KHam ke liye

har-chand apna nama-e-isyan siyah ho

hoga safed subh hai har sham ke liye

namard aur mard mein itna hi farq hai

wo nan ke liye mare ye nam ke liye

misl-e-kamand apni rasai hui agar

ai qasr-e-yar bose lab-e-baam ke liye

kya chashm-e-mast-e-yar se tashbih dijiye

kaifiyyat-e-nigah nahin jam ke liye

rakhwa ke zulfen yar ne lakhon hi murgh-e-dil

paida kiye hain kashmakash-e-dam ke liye

dil mein siwae yar jagah ho na ghair ki

KHalwat sara-e-KHas nahin aam ke liye

jata hai bahr-e-ghusl jo ai KHush-dimagh tu

jalta hai ud garmi-e-hammam ke liye

'atish' jo chahe pae tawakkul ke mahkame

jo subh ko mile na rahe sham ke liye