naz par ye gudaz kaise hai

naaz par ye gudāz kaise hai

tū haqīqat majāz kaise hai

mujh ko dhaḌkan kā hai sadā dhaḌkā

nā dhaḌakne se baaz kaise hai

ye jahāñ hai jahāñ bhī dekhoge

phir nasheb-o-farāz kaise hai

koī kūfa-o-karbalā meñ shahīd

koī mahmūd ayaaz kaise hai

zindagī kā yā maut kā ho shu.ūr

ye mujhe be-riyāz kaise hai

ai mire ḳhvāb tū agar hai gumāñ

tū haqīqat-navāz kaise hai

jab nahīñ hai kisī ko merā lihāz

mujh ko sab kā lihāz kaise hai

jo nahīñ vaqt kāTte kaTtā

haal kā imtiyāz kaise hai

rashk-e-maḳhlūq aadmī 'āmir'

ik qalam kī bayāz kaise hai

naz par ye gudaz kaise hai

tu haqiqat majaz kaise hai

mujh ko dhaDkan ka hai sada dhaDka

na dhaDakne se baz kaise hai

ye jahan hai jahan bhi dekhoge

phir nasheb-o-faraaz kaise hai

koi kufa-o-karbala mein shahid

koi mahmud ayaz kaise hai

zindagi ka ya maut ka ho shuur

ye mujhe be-riyaz kaise hai

ai mere KHwab tu agar hai guman

tu haqiqat-nawaz kaise hai

jab nahin hai kisi ko mera lihaz

mujh ko sab ka lihaz kaise hai

jo nahin waqt kaTte kaTta

haal ka imtiyaz kaise hai

rashk-e-maKHluq aadmi 'amir'

ek qalam ki bayaz kaise hai