naz raston ke uThate hue thak jata hun

naaz rastoñ ke uThāte hue thak jaatā huuñ

maiñ tirī bazm meñ aate hue thak jaatā huuñ

phir na.e ġham kī zarūrat hai mirī ġhazloñ ko

roz kī baat batāte hue thak jaatā huuñ

zindagī tujh se bhī ab rūThne ko dil chāhe

bārhā tujh ko manāte hue thak jaatā huuñ

lab-kushā.ī to karo tum bhī mire haq meñ kabhī

maiñ tumhārā huuñ batāte hue thak jaatā huuñ

qarz kam-zarf se lene meñ hai nuqsān bahut

us kā ehsān chukāte hue thak jaatā huuñ

ilm hotā hai haqīqat meñ jahālat kā javāb

maiñ to asbāq paḌhāte hue thak jaatā huuñ

dil kā vo mail magar saaf nahīñ hotā 'adīb'

haath dushman se milāte hue thak jaatā huuñ

naz raston ke uThate hue thak jata hun

main teri bazm mein aate hue thak jata hun

phir nae gham ki zarurat hai meri ghazlon ko

roz ki baat batate hue thak jata hun

zindagi tujh se bhi ab ruThne ko dil chahe

barha tujh ko manate hue thak jata hun

lab-kushai to karo tum bhi mere haq mein kabhi

main tumhaara hun batate hue thak jata hun

qarz kam-zarf se lene mein hai nuqsan bahut

us ka ehsan chukate hue thak jata hun

ilm hota hai haqiqat mein jahaalat ka jawab

main to asbaq paDhate hue thak jata hun

dil ka wo mail magar saf nahin hota 'adib'

hath dushman se milate hue thak jata hun