nabz-e-ayyam tere khoj mein chalna chahe

nabz-e-ayyām tire khoj meñ chalnā chāhe

vaqt ḳhud shīsha-e-sā.at se nikalnā chāhe

dastakeñ detā hai paiham mirī shiryānoñ meñ

ek chashma ki jo patthar se ubalnā chāhe

mujh ko manzūr hai vo silsila-e-sañg-e-girāñ

kohkan mujh se agar vaqt badalnā chāhe

tham gayā aa ke dam-e-bāz-pasīñ lab pe vo naam

dil ye motī na ugalnā na nigalnā chāhe

ham to ai daur-e-zamāñ ḳhaak ke zarre Thahre

tū to phūloñ ko bhī qadmoñ meñ masalnā chāhe

kah rahī hai ye zamistāñ kī shab-e-chārdahum

koī parvāna jo is aag meñ jalnā chāhe

umr isī Thokareñ khāne ke amal meñ guzrī

jis tarah sañg Dhalānoñ pe sambhalnā chāhe

sub.h-dam jis ne uchhālā thā fazā meñ ḳhurshed

dil sar-e-shām usī baam pe Dhalnā chāhe

nabz-e-ayyam tere khoj mein chalna chahe

waqt KHud shisha-e-saat se nikalna chahe

dastaken deta hai paiham meri shiryanon mein

ek chashma ki jo patthar se ubalna chahe

mujh ko manzur hai wo silsila-e-sang-e-giran

kohkan mujh se agar waqt badalna chahe

tham gaya aa ke dam-e-baz-pasin lab pe wo nam

dil ye moti na ugalna na nigalna chahe

hum to ai daur-e-zaman KHak ke zarre Thahre

tu to phulon ko bhi qadmon mein masalna chahe

kah rahi hai ye zamistan ki shab-e-chaardahum

koi parwana jo is aag mein jalna chahe

umr isi Thokaren khane ke amal mein guzri

jis tarah sang Dhalanon pe sambhalna chahe

subh-dam jis ne uchhaala tha faza mein KHurshed

dil sar-e-sham usi baam pe Dhalna chahe