ندی کے دونوں کناروں سے بات کرتے ہوئے

ندی کے دونوں کناروں سے بات کرتے ہوئے

میں رونے لگتا ہوں دھاروں سے بات کرتے ہوئے

پہنچ کے آخری منزل پہ چپ ہی رہنا ہے

سو گھر سے نکلے ہیں یاروں سے بات کرتے ہوئے

کوئی بھی شک نہ کرے بس اسی لئے مجھ سے

وہ بات کرتا ہے ساروں سے بات کرتے ہوئے

تیرے علاوہ وہاں کوئی بھی نہیں تھا مرا

کسے بلاتا اشاروں سے بات کرتے ہوئے

تمام رات مرا انتظار کرتا رہا

کل ایک چاند ستاروں سے بات کرتے ہوئے

عجیب لوگ تھے گزرے تو بس گزر ہی گئے

سڑک پہ دوڑتی کاروں سے بات کرتے ہوئے