nadi pahaD samundar chaTan kuchh bhi nahin

nadī pahāḌ samundar chaTān kuchh bhī nahīñ

javāñ ho azm to phir āsmān kuchh bhī nahīñ

ravish ġhalat hai to rāhoñ meñ aḌchaneñ haiñ bahut

irāde nek hoñ to imtihān kuchh bhī nahīñ

vo apnī sho.ala-bayānī se qatl kartā hai

agarche haath meñ tīr-o-kamān kuchh bhī nahīñ

haiñ mulk-o-qaum ke e.azāz sab tumhāre liye

mire buzurgoñ ke shāyān-e-shān kuchh bhī nahīñ

na ab to maañ hai na hī maañ kī yaad hai ghar meñ

sarautā lauñg Dalī pān-dān kuchh bhī nahīñ

mire liye to ye baḌh kar hai jaan se merī

tire liye to mirā ḳhāndān kuchh bhī nahīñ

ye beTiyoñ kī duāoñ kā nek-samra hai

kaTī hai umr badan meñ thakān kuchh bhī nahīñ

mirī kahāniyāñ phailī huī haiñ chāroñ taraf

mire baġhair tirī dāstān kuchh bhī nahīñ

vatan ke naam hai 'dīdār' zindagī apnī

vatan ke sāmne ye jism-o-jān kuchh bhī nahīñ

nadi pahaD samundar chaTan kuchh bhi nahin

jawan ho azm to phir aasman kuchh bhi nahin

rawish ghalat hai to rahon mein aDchanen hain bahut

irade nek hon to imtihan kuchh bhi nahin

wo apni shoala-bayani se qatl karta hai

agarche hath mein tir-o-kaman kuchh bhi nahin

hain mulk-o-qaum ke eazaz sab tumhaare liye

mere buzurgon ke shayan-e-shan kuchh bhi nahin

na ab to man hai na hi man ki yaad hai ghar mein

sarauta laung Dali pan-dan kuchh bhi nahin

mere liye to ye baDh kar hai jaan se meri

tere liye to mera KHandan kuchh bhi nahin

ye beTiyon ki duaon ka nek-samra hai

kaTi hai umr badan mein thakan kuchh bhi nahin

meri kahaniyan phaili hui hain chaaron taraf

mere baghair teri dastan kuchh bhi nahin

watan ke nam hai 'didar' zindagi apni

watan ke samne ye jism-o-jaan kuchh bhi nahin