nadim-e-dard-e-mohabbat baDa sahaara hai

nadīm-e-dard-e-mohabbat baḌā sahārā hai

jabhī to ye ġham-e-daurāñ hameñ gavārā hai

zamāna kahtā hai hañgāma-e-hayāt jise

mire hujūm-e-tamannā kā isti.āra hai

jo mere dil ko hai ātish-kada banā.e hue

vo soz un kī nazar kā hī āshkārā hai

akelā chhoḌ ke tūfān ko guzar jaa.e

ye be-ruḳhī mirī kashtī ko kab gavārā hai

na jaane mauj-e-tabassum hai yā koī aañsū

phir un ke hoñT pe betāb ik sitārā hai

majāl-e-ishq kahāñ thī ki ham ko kartā ḳhaak

hameñ to ziist kī pāmāliyoñ ne maarā hai

vafā-e-dost kī mastī nasīb hai 'sāġhar'

jafā-e-dahr faqat is liye gavārā hai

nadim-e-dard-e-mohabbat baDa sahaara hai

jabhi to ye gham-e-dauran hamein gawara hai

zamana kahta hai hangama-e-hayat jise

mere hujum-e-tamanna ka istiara hai

jo mere dil ko hai aatish-kada banae hue

wo soz un ki nazar ka hi aashkara hai

akela chhoD ke tufan ko guzar jae

ye be-ruKHi meri kashti ko kab gawara hai

na jaane mauj-e-tabassum hai ya koi aansu

phir un ke honT pe betab ek sitara hai

majal-e-ishq kahan thi ki hum ko karta KHak

hamein to zist ki pamaliyon ne mara hai

wafa-e-dost ki masti nasib hai 'saghar'

jafa-e-dahr faqat is liye gawara hai