nadim kahiyo agar un se koi baat chale

nadīm kahiyo agar un se koī baat chale

ham un kī bazm se mahrūm-e-iltifāt chale

ye dil uThā.egā phir ḳhūn-e-ārzū ke maze

phir aaj kar ke vo tark-e-ta'alluqāt chale

mahak mahak uThīñ tanhā.iyāñ mire ghar kī

kuchh aise silsile yādoñ ke saarī raat chale

qatīl-e-shoḳhī-e-raftār haiñ ham ahl-e-dil

hamāre saath sañbhal kar ġham-e-hayāt chale

ye jitne rind haiñ sab bhuul jaa.eñ apne ġham

jo mai-kade meñ kabhī merī un kī baat chale

rukeñ to yuuñ ki zamāne kī nabz ruk jaa.e

chaleñ to aise chaleñ saath kā.enāt chale

'bahār' aaj koī yaad aa rahā hai phir

phir aao jaam chale aur saarī raat chale

nadim kahiyo agar un se koi baat chale

hum un ki bazm se mahrum-e-iltifat chale

ye dil uThaega phir KHun-e-arzu ke maze

phir aaj kar ke wo tark-e-ta'alluqat chale

mahak mahak uThin tanhaiyan mere ghar ki

kuchh aise silsile yaadon ke sari raat chale

qatil-e-shoKHi-e-raftar hain hum ahl-e-dil

hamare sath sanbhal kar gham-e-hayat chale

ye jitne rind hain sab bhul jaen apne gham

jo mai-kade mein kabhi meri un ki baat chale

ruken to yun ki zamane ki nabz ruk jae

chalen to aise chalen sath kaenat chale

'bahaar' aaj koi yaad aa raha hai phir

phir aao jam chale aur sari raat chale