nae ek shahr ko subh-e-safar kya le chali mujhko

na.e ik shahr ko sub.h-e-safar kyā le chalī mujh ko

sadā.eñ de rahī hai ek chhoTī sī galī mujh ko

maiñ apnī umr bhar kā chain jab us dar pe chhoḌ aayā

milī hai tab kahīñ jā kar zarā sī be-kalī mujh ko

maiñ qatre gin ke insānoñ kī taqdīreñ banātā huuñ

zarā sī tishna-kāmī ne banā Daalā valī mujh ko

maiñ vo gulshan-gazīda huuñ ki tanhā.ī ke mausam meñ

nahīñ hote agar kāñTe to Dastī hai kalī mujh ko

mohabbat thī use lekin mirā iflās jab dekhā

pareshāñ sī nazar aa.ī vo nāzoñ kī palī mujh ko

'qatīl' ābād jab ghar thā to kyuuñ mujh par kahīñ ġhazleñ

ye ta.ana jaate jaate de ga.ī ik dil-jalī mujh ko

nae ek shahr ko subh-e-safar kya le chali mujh ko

sadaen de rahi hai ek chhoTi si gali mujh ko

main apni umr bhar ka chain jab us dar pe chhoD aaya

mili hai tab kahin ja kar zara si be-kali mujh ko

main qatre gin ke insanon ki taqdiren banata hun

zara si tishna-kaami ne bana Dala wali mujh ko

main wo gulshan-gazida hun ki tanhai ke mausam mein

nahin hote agar kanTe to Dasti hai kali mujh ko

mohabbat thi use lekin mera iflas jab dekha

pareshan si nazar aai wo nazon ki pali mujh ko

'qatil' aabaad jab ghar tha to kyun mujh par kahin ghazlen

ye tana jate jate de gai ek dil-jali mujh ko