nae jahan mein purani sharab le aae

na.e jahāñ meñ purānī sharāb le aa.e

añdherī raat meñ ham āftāb le aa.e

mire yaqīn meñ gunjā.ish-e-dalīl nahīñ

javāz DhūñDne vaale kitāb le aa.e

paḌe the ek hī aalam meñ ahl-e-mai-ḳhāna

shikast-e-jām se ham inqalāb le aa.e

vo kāmyāb-e-mohabbat haiñ jo tire dar se

ḳhud apne aap ko nā-kāmyāb le aa.e

tamām umr jo chhāyā rahegā āñkhoñ meñ

tumhārī bazm se ham aisā ḳhvāb le aa.e

yahāñ to ek bhī ġham-āshnā nahīñ apnā

farishte mujh ko kahāñ be-naqāb le aa.e

hayāt-e-ishq meñ ham toḌ kar quyūd-e-vafā

kisī bhī taur sahī inqalāb le aa.e

vahī safīne jo tūfāñ-shanās the fitrat

sukūt-e-shahr meñ ik iztirāb le aa.e

nae jahan mein purani sharab le aae

andheri raat mein hum aaftab le aae

mere yaqin mein gunjaish-e-dalil nahin

jawaz DhunDne wale kitab le aae

paDe the ek hi aalam mein ahl-e-mai-KHana

shikast-e-jam se hum inqalab le aae

wo kaamyab-e-mohabbat hain jo tere dar se

KHud apne aap ko na-kaamyab le aae

tamam umr jo chhaya rahega aankhon mein

tumhaari bazm se hum aisa KHwab le aae

yahan to ek bhi gham-ashna nahin apna

farishte mujh ko kahan be-naqab le aae

hayat-e-ishq mein hum toD kar quyud-e-wafa

kisi bhi taur sahi inqalab le aae

wahi safine jo tufan-shanas the fitrat

sukut-e-shahr mein ek iztirab le aae