nae mujrim hain puranon ki taraf dekhte hain

na.e mujrim haiñ purānoñ kī taraf dekhte haiñ

muqtadī apne imāmoñ kī taraf dekhte haiñ

ḳhauf se bhaag khaḌe hote haiñ buzdil faujī

ham nadāmat se shahīdoñ kī taraf dekhte haiñ

itnā pyārā hai vo chehra ki nazar paḌte hī

log hāthoñ kī lakīroñ kī taraf dekhte haiñ

hijr raas aatā to kyuuñ karte tujhe yaad miyāñ

dhuup lagtī hai to chhāñv kī taraf dekhte haiñ

kyā ḳhasārā hai inheñ bachchoñ kā ghar basne meñ

ham ta.ajjub se buzurgoñ kī taraf dekhte haiñ

jin ko āsānī se dīdār mayassar hai tirā

vo kahāñ baaġh meñ phūloñ kī taraf dekhte haiñ

pahlā mauqa hai mohabbat kī taraf-dārī kā

kabhī us ko kabhī logoñ kī taraf dekhte haiñ

nae mujrim hain puranon ki taraf dekhte hain

muqtadi apne imamon ki taraf dekhte hain

KHauf se bhag khaDe hote hain buzdil fauji

hum nadamat se shahidon ki taraf dekhte hain

itna pyara hai wo chehra ki nazar paDte hi

log hathon ki lakiron ki taraf dekhte hain

hijr ras aata to kyun karte tujhe yaad miyan

dhup lagti hai to chhanw ki taraf dekhte hain

kya KHasara hai inhen bachchon ka ghar basne mein

hum tajjub se buzurgon ki taraf dekhte hain

jin ko aasani se didar mayassar hai tera

wo kahan bagh mein phulon ki taraf dekhte hain

pahla mauqa hai mohabbat ki taraf-dari ka

kabhi us ko kabhi logon ki taraf dekhte hain