nae shishe mein ab Dhal jae har rasm-e-kuhan saqi

na.e shīshe meñ ab Dhal jaa.e har rasm-e-kuhan saaqī

tujhe duniyā badaltī hai mujhe ye anjuman saaqī

vahāñ kis kaam ke ye sāġhar-o-mīnā-o-paimāna

jahāñ chaltā hai terī mast āñkhoñ kā chalan saaqī

na aañkh uTThī na mai chhalkī na sāġhar daur meñ aaya

mujhe detā rahā dhoke ye terā bāñkpan saaqī

likhā hai naam merā yuuñ to har ik shāḳh par lekin

na mere phuul haiñ saaqī na merā hai chaman saaqī

haTā sāġhar na mere sāmne se is ko rahne de

ki is se jhāñktī hai mere ḳhvāboñ kī dul.han saaqī

mazā jab hai mirī mastī ko tū do-ātisha kar de

nigāhoñ se nigāhoñ kā bhī hone de milan saaqī

zarā bhīgī huī zulfoñ kī do ik buuñd Tapkā de

sulagtā hai na jaane kab se merā tan-badan saaqī

tirī zulfoñ ke saa.e meñ Dhalī rātoñ kā kyā kahnā

magar kuchh aur kahtā hai 'sahar' kā bāñkpan saaqī

nae shishe mein ab Dhal jae har rasm-e-kuhan saqi

tujhe duniya badalti hai mujhe ye anjuman saqi

wahan kis kaam ke ye saghar-o-mina-o-paimana

jahan chalta hai teri mast aankhon ka chalan saqi

na aankh uTThi na mai chhalki na saghar daur mein aaya

mujhe deta raha dhoke ye tera bankpan saqi

likha hai nam mera yun to har ek shaKH par lekin

na mere phul hain saqi na mera hai chaman saqi

haTa saghar na mere samne se is ko rahne de

ki is se jhankti hai mere KHwabon ki dulhan saqi

maza jab hai meri masti ko tu do-atisha kar de

nigahon se nigahon ka bhi hone de milan saqi

zara bhigi hui zulfon ki do ek bund Tapka de

sulagta hai na jaane kab se mera tan-badan saqi

teri zulfon ke sae mein Dhali raaton ka kya kahna

magar kuchh aur kahta hai 'sahar' ka bankpan saqi