nae sire se phir aaj kaifi hum apni duniya basa rahe hain

na.e sire se phir aaj 'kaifī' ham apnī duniyā basā rahe haiñ

jo kho chuke us se be-ḳhabar haiñ jo rah gayā vo luTā rahe haiñ

nashāt-e-imroz kī qasam hai ki dil ne sab mahfileñ bhulā diiñ

diye the maazī ne daaġh jitne vo ḳhud-ba-ḳhud miTte jā rahe haiñ

ḳhushā ye daur-e-shabāb un kā ye dil-navāz iltifāt un kā

ki be-piye aaj har qadam par mire qadam laḌkhaḌā rahe haiñ

udhar nazar hai idhar nazar hai kuchh apnī rusvā.iyoñ kā Dar hai

jhijak rahe haiñ ThiThak rahe haiñ magar mirī samt aa rahe haiñ

hayā ne go jur.at-e-takallum zabān se chhīn lī hai lekin

vo āñkhoñ āñkhoñ hī meñ bahut kuchh sunā chuke aur sunā rahe haiñ

shabāb hai aur shādmānī bahār hai aur kāmrānī

bane haiñ sarshārī-e-mujassam mujhe bhī vo ḳhud banā rahe haiñ

nae sire se phir aaj 'kaifi' hum apni duniya basa rahe hain

jo kho chuke us se be-KHabar hain jo rah gaya wo luTa rahe hain

nashat-e-imroz ki qasam hai ki dil ne sab mahfilen bhula din

diye the mazi ne dagh jitne wo KHud-ba-KHud miTte ja rahe hain

KHusha ye daur-e-shabab un ka ye dil-nawaz iltifat un ka

ki be-piye aaj har qadam par mere qadam laDkhaDa rahe hain

udhar nazar hai idhar nazar hai kuchh apni ruswaiyon ka Dar hai

jhijak rahe hain ThiThak rahe hain magar meri samt aa rahe hain

haya ne go jurat-e-takallum zaban se chhin li hai lekin

wo aankhon aankhon hi mein bahut kuchh suna chuke aur suna rahe hain

shabab hai aur shadmani bahaar hai aur kaamrani

bane hain sarshaari-e-mujassam mujhe bhi wo KHud bana rahe hain