nae tarz ka mere sath aapne chhal kiya

na.e tarz kā mire saath aap ne chhal kiyā

mire baa'd mere kahe hue pe 'amal kiyā

tire baa'd ḳhud ko sañvārne meñ lage haiñ ham

tirī yaad meñ to na rā.egāñ koī pal kiyā

ai kahīñ se Tuut ke aa.e shaḳhs ḳhudā ne hī

mirī shakl meñ tujhe pesh sabr kā phal kiyā

abhī us kī vaj.h-e-ġhazal hue haiñ 'bilāl' ham

kisī vaqt meñ jise ham ne vaj.h-e-ġhazal kiyā

nae tarz ka mere sath aap ne chhal kiya

mere ba'd mere kahe hue pe 'amal kiya

tere ba'd KHud ko sanwarne mein lage hain hum

teri yaad mein to na raegan koi pal kiya

ai kahin se Tut ke aae shaKHs KHuda ne hi

meri shakl mein tujhe pesh sabr ka phal kiya

abhi us ki wajh-e-ghazal hue hain 'bilal' hum

kisi waqt mein jise hum ne wajh-e-ghazal kiya