nae zamane ka insan kuchh ajib sa hai

na.e zamāne kā insān kuchh ajiib sā hai

na aadmī hai na haivān kuchh ajiib sā hai

kisī kī jaan kī parvā na aabrū kā ḳhayāl

hamāre ghar kā nigahbān kuchh ajiib sā hai

basī thī pyaar kī ḳhushbū yahāñ to ghar ghar meñ

rafāqatoñ kā ye fuqdān kuchh ajiib sā hai

mabādā phir koī tūfān aane vaalā ho

ye iztirāb ye haijān kuchh ajiib sā hai

hai ek haath meñ talvār ek meñ hai gulāb

ġharīb-ḳhāne kā mehmān kuchh ajiib sā hai

chhuḌā ke aa.e ho kis ḳhār-zār se dāman

ye taar taar garebān kuchh ajiib sā hai

vo sang-dil hai 'sahar' aaj mehrbān bahut

ilāhī ḳhair ye ehsān kuchh ajiib sā hai

nae zamane ka insan kuchh ajib sa hai

na aadmi hai na haiwan kuchh ajib sa hai

kisi ki jaan ki parwa na aabru ka KHayal

hamare ghar ka nigahban kuchh ajib sa hai

basi thi pyar ki KHushbu yahan to ghar ghar mein

rafaqaton ka ye fuqdan kuchh ajib sa hai

mabaada phir koi tufan aane wala ho

ye iztirab ye haijaan kuchh ajib sa hai

hai ek hath mein talwar ek mein hai gulab

gharib-KHane ka mehman kuchh ajib sa hai

chhuDa ke aae ho kis KHar-zar se daman

ye tar tar gareban kuchh ajib sa hai

wo sang-dil hai 'sahar' aaj mehrban bahut

ilahi KHair ye ehsan kuchh ajib sa hai