nafas ke loch mein ram hi nahin kuchh aur bhi hai

nafas ke loch meñ ram hī nahīñ kuchh aur bhī hai

hayāt sāġhar-e-sam hī nahīñ kuchh aur bhī hai

tirī nigāh mire ġham kī pāsdār sahī

mirī nigāh meñ ġham hī nahīñ kuchh aur bhī hai

mirī nadīm mohabbat kī rif.atoñ se na gir

buland bām-e-haram hī nahīñ kuchh aur bhī hai

ye ijtināb hai aks-e-shu.ūr-e-mahbūbī

ye ehtiyāt-e-sitam hī nahīñ kuchh aur bhī hai

idhar bhī ek uchaTtī nazar ki duniyā meñ

faroġh-e-mahfil-e-jam hī nahīñ kuchh aur bhī hai

na.e jahān basā.e haiñ fikr-e-ādam ne

ab is zamīñ pe iram hī nahīñ kuchh aur bhī hai

mire shu.ūr ko āvāra kar diyā jis ne

vo marg-e-shādī-o-ġham hī nahīñ kuchh aur bhī hai

nafas ke loch mein ram hi nahin kuchh aur bhi hai

hayat saghar-e-sam hi nahin kuchh aur bhi hai

teri nigah mere gham ki pasdar sahi

meri nigah mein gham hi nahin kuchh aur bhi hai

meri nadim mohabbat ki rifaton se na gir

buland baam-e-haram hi nahin kuchh aur bhi hai

ye ijtinab hai aks-e-shuur-e-mahbubi

ye ehtiyat-e-sitam hi nahin kuchh aur bhi hai

idhar bhi ek uchaTti nazar ki duniya mein

farogh-e-mahfil-e-jam hi nahin kuchh aur bhi hai

nae jahan basae hain fikr-e-adam ne

ab is zamin pe iram hi nahin kuchh aur bhi hai

mere shuur ko aawara kar diya jis ne

wo marg-e-shadi-o-gham hi nahin kuchh aur bhi hai