nafas nafas hai tere gham se chur chur ab tak

nafas nafas hai tire ġham se chuur chuur ab tak

na shaam hai na saverā qarīb duur ab tak

sunī-sunā.ī pe mat jā zarā qarīb to aa

sazā na de ki mohabbat hai be-qusūr ab tak

machal rahī hai kahīñ jū-e-shīr ai farhād

kalīm san to sahī jal rahā hai tuur ab tak

mire ḳhudā maiñ kahāñ jā.ūñ kis tarah DhūñDūñ

mujhe pukār rahā hai koī zarūr ab tak

na tū mirā na tirī ham-nashīniyāñ merī

bharam hai jis ko samajhte haiñ sab ġhurūr ab tak

idhar vafūr-e-mohabbat udhar muravvat thī

jo kuchh kahā thā bhulā de tire huzūr ab tak

chalā gayā hai makīñ chhoḌ kar makāñ apnā

koī nahīñ hai magar chhan rahā hai nuur ab tak

vo ek hādisa-e-rūh-o-dil ki biit gayā

jise na maan sakā 'shāz' kā shu.ūr ab tak

nafas nafas hai tere gham se chur chur ab tak

na sham hai na sawera qarib dur ab tak

suni-sunai pe mat ja zara qarib to aa

saza na de ki mohabbat hai be-qusur ab tak

machal rahi hai kahin ju-e-shir ai farhad

kalim san to sahi jal raha hai tur ab tak

mere KHuda main kahan jaun kis tarah DhunDun

mujhe pukar raha hai koi zarur ab tak

na tu mera na teri ham-nashiniyan meri

bharam hai jis ko samajhte hain sab ghurur ab tak

idhar wafur-e-mohabbat udhar murawwat thi

jo kuchh kaha tha bhula de tere huzur ab tak

chala gaya hai makin chhoD kar makan apna

koi nahin hai magar chhan raha hai nur ab tak

wo ek hadisa-e-ruh-o-dil ki bit gaya

jise na man saka 'shaz' ka shuur ab tak