nafas nafas mein nihan iztirab hota hai

nafas nafas meñ nihāñ iztirāb hotā hai

balā kī chiiz ye daur-e-shabāb hotā hai

hai dafn is meñ har ik zindagī kā afsāna

har ek chehra mukammal kitāb hotā hai

kisī kī yaad meñ guzrā huā har ik lamha

bahut hasīn bahut lā-javāb hotā hai

kisī kā naam badalne se kuchh nahīñ hotā

gul-e-gulāb hamesha gulāb hotā hai

vafā meñ jaan bhī jaa.e to ġham na kar ai dil

vafā kī raah meñ miTnā savāb hotā hai

mire salām-e-mohabbat pe aap chup kyoñ haiñ

har ik savāl kā kuchh to javāb hotā hai

jinheñ nasīb huī hai 'kañval' shab-e-hijrāñ

unheñ ḳhabar hai ki kyā iztirāb hotā hai

nafas nafas mein nihan iztirab hota hai

bala ki chiz ye daur-e-shabab hota hai

hai dafn is mein har ek zindagi ka afsana

har ek chehra mukammal kitab hota hai

kisi ki yaad mein guzra hua har ek lamha

bahut hasin bahut la-jawab hota hai

kisi ka nam badalne se kuchh nahin hota

gul-e-gulab hamesha gulab hota hai

wafa mein jaan bhi jae to gham na kar ai dil

wafa ki rah mein miTna sawab hota hai

mere salam-e-mohabbat pe aap chup kyon hain

har ek sawal ka kuchh to jawab hota hai

jinhen nasib hui hai 'kanwal' shab-e-hijran

unhen KHabar hai ki kya iztirab hota hai