nafas nafas ne uDain hawaiyan kya kya

nafas nafas ne uḌā.īñ havā.iyāñ kyā kyā

ba-rañg-e-ishq huiiñ jag-hañsā.iyāñ kyā kyā

hamīñ ne ishq ko husn-e-anā kā rañg diyā

hamīñ pe ishq meñ aa.iiñ burā.iyāñ kyā kyā

mire taqaddus-e-īmāñ se kheltī hī rahīñ

tirī nigāh kī kāfir-adā.iyāñ kyā kyā

sukūñ-girafta na dil hī na aañkh ḳhūñ-basta

tamām umr rahīñ nā-rasā.iyāñ kyā kyā

judā.iyoñ se bhī uqde rafāqatoñ ke khule

rafāqatoñ meñ bhī aa.iiñ judā.iyāñ kyā kyā

hai aah ek ġhazal ashk ik qasīda hai

nihāñ haiñ ġham meñ bhī naġhma-sarā.iyāñ kyā kyā

rafīq mujh sā kahīñ pā.egī na ai 'aḳhgar'

machāegī shab-e-hijrāñ duhā.iyāñ kyā kyā

nafas nafas ne uDain hawaiyan kya kya

ba-rang-e-ishq huin jag-hansaiyan kya kya

hamin ne ishq ko husn-e-ana ka rang diya

hamin pe ishq mein aain buraiyan kya kya

mere taqaddus-e-iman se khelti hi rahin

teri nigah ki kafir-adaiyan kya kya

sukun-girafta na dil hi na aankh KHun-basta

tamam umr rahin na-rasaiyan kya kya

judaiyon se bhi uqde rafaqaton ke khule

rafaqaton mein bhi aain judaiyan kya kya

hai aah ek ghazal ashk ek qasida hai

nihan hain gham mein bhi naghma-saraiyan kya kya

rafiq mujh sa kahin paegi na ai 'aKHgar'

machaegi shab-e-hijran duhaiyan kya kya