nafas nafas pe naya soz-e-agahi rakhna

nafas nafas pe nayā soz-e-āgahī rakhnā

kisī kā dard bhī ho aañkh meñ namī rakhnā

vo tishna-lab huuñ ki merī anā kā hai me.aar

samundaroñ se bhī paimān-e-tishnagī rakhnā

rafāqatoñ ke tasalsul se jī na bhar jaa.e

judā.iyoñ kā bhī mausam kabhī kabhī rakhnā

vafā kisī pe koī qarz to nahīñ hotī

jo ho sake to hamārā ḳhayāl bhī rakhnā

kahīñ sitam ke añdhere na ruuh ko Das leñ

fasīl-e-jism pe zaḳhmoñ kī raushnī rakhnā

charāġh-e-sub.h sahī ham hamāre maslak meñ

ravā nahīñ hai añdheroñ se dostī rakhnā

ajiib shaḳhs hai vo bhī ki us ko aatā hai

gurez meñ bhī adā-e-supurdagī rakhnā

ta.alluqāt meñ raḳhne bhī Daal detā hai

har aadmī se umīdeñ na.ī na.ī rakhnā

hamārā kaam hai harfoñ ko raushnī de kar

ḳhud apne zarf meñ chiñgāriyāñ dabī rakhnā

havā-e-shab kā nahīñ e.atibār ai 'shā.ir'

hazār niiñd ho āñkheñ magar khulī rakhnā

nafas nafas pe naya soz-e-agahi rakhna

kisi ka dard bhi ho aankh mein nami rakhna

wo tishna-lab hun ki meri ana ka hai mear

samundaron se bhi paiman-e-tishnagi rakhna

rafaqaton ke tasalsul se ji na bhar jae

judaiyon ka bhi mausam kabhi kabhi rakhna

wafa kisi pe koi qarz to nahin hoti

jo ho sake to hamara KHayal bhi rakhna

kahin sitam ke andhere na ruh ko Das len

fasil-e-jism pe zaKHmon ki raushni rakhna

charagh-e-subh sahi hum hamare maslak mein

rawa nahin hai andheron se dosti rakhna

ajib shaKHs hai wo bhi ki us ko aata hai

gurez mein bhi ada-e-supurdagi rakhna

talluqat mein raKHne bhi Dal deta hai

har aadmi se umiden nai nai rakhna

hamara kaam hai harfon ko raushni de kar

KHud apne zarf mein chingariyan dabi rakhna

hawa-e-shab ka nahin eatibar ai 'shair'

hazar nind ho aankhen magar khuli rakhna