nafrat ke andheron ko miTane ke liye aa

nafrat ke añdheroñ ko miTāne ke liye aa

aa sham-e-mohabbat ko jalāne ke liye aa

bebāk huā jaatā hai ab dard-e-judā.ī

ubhre hue zaḳhmoñ ko dabāne ke liye aa

kab tak maiñ sambhālūñ tirī yādoñ kī amānat

ye bār-e-garāñ dil se haTāne ke liye aa

yādoñ ke darīchoñ meñ tirā ruup hai lekin

ab hijr kā ehsās bhulāne ke liye aa

ehsās ke sahrā kī udāsī nahīñ jaatī

jharnoñ kī tarah giit sunāne ke liye aa

ik terī mohabbat kā muhāfiz hai mirā dil

ḳhud apne liye mujh ko bachāne ke liye aa

mujh ko to hai manzūr tire pyaar meñ 'arshad'

amrit na sahī zahr pilāne ke liye aa

nafrat ke andheron ko miTane ke liye aa

aa sham-e-mohabbat ko jalane ke liye aa

bebak hua jata hai ab dard-e-judai

ubhre hue zaKHmon ko dabane ke liye aa

kab tak main sambhaalun teri yaadon ki amanat

ye bar-e-garan dil se haTane ke liye aa

yaadon ke darichon mein tera rup hai lekin

ab hijr ka ehsas bhulane ke liye aa

ehsas ke sahra ki udasi nahin jati

jharnon ki tarah git sunane ke liye aa

ek teri mohabbat ka muhafiz hai mera dil

KHud apne liye mujh ko bachane ke liye aa

mujh ko to hai manzur tere pyar mein 'arshad'

amrit na sahi zahr pilane ke liye aa