nafs se jo laDa nahin karte

nafs se jo laḌā nahīñ karte

ruuh par vo jilā nahīñ karte

kyuuñ na ho phir fasād duniyā meñ

log ḳhauf-e-ḳhudā nahīñ karte

ahl-e-dil ahl-e-zarf ahl-e-nazar

baat dil kī kahā nahīñ karte

un kā jiinā abas hai duniyā meñ

jo kisī kā bhalā nahīñ karte

bazm-e-ishrat meñ āshiqān-e-tarab

nāla-e-dil sunā nahīñ karte

dostī kyā karūñ maiñ phūloñ se

ye hamesha khilā nahīñ karte

dars lo TūTte habāboñ se

sar uThā kar chalā nahīñ karte

ai 'jalī' dahr ke satā.e hue

zindagī kī duā nahīñ karte

nafs se jo laDa nahin karte

ruh par wo jila nahin karte

kyun na ho phir fasad duniya mein

log KHauf-e-KHuda nahin karte

ahl-e-dil ahl-e-zarf ahl-e-nazar

baat dil ki kaha nahin karte

un ka jina abas hai duniya mein

jo kisi ka bhala nahin karte

bazm-e-ishrat mein aashiqan-e-tarab

nala-e-dil suna nahin karte

dosti kya karun main phulon se

ye hamesha khila nahin karte

dars lo TuTte hababon se

sar uTha kar chala nahin karte

ai 'jali' dahr ke satae hue

zindagi ki dua nahin karte