نگر نگر دل مضطر لیے پھرا مجھ کو

نگر نگر دل مضطر لیے پھرا مجھ کو

مجھے تلاش تھی جس کی نہ مل سکا مجھ کو

میں اس کے بارے میں کچھ اس سے پوچھتا لیکن

ملا وہ جب کبھی بکھرا ہوا ملا مجھ کو

میں آندھیوں سے لڑوں گا یہ میں نے سوچا تھا

ہوا کا ایک ہی جھونکا بجھا گیا مجھ کو

مری وفا کا اسے بھی ہے کس قدر احساس

وہ کتنے دکھ سے یہ کہتا ہے بھول جا مجھ کو

کٹی ہے کرب و بلا میں تمام عمر مری

حیات لگتی ہے میدان کربلا مجھ کو

جتن کرو مجھے واپس زمیں پہ لانے کا

نہ ایسا ہو کہ نگل جائے یہ خلا مجھ کو

میں اپنے آپ میں کھویا ہوا تھا اے عابدؔ

کہاں کہاں وہ مگر ڈھونڈھتا پھرا مجھ کو