nagar-nagar dil-e-muztar liye phira mujhko

nagar-nagar dil-e-muztar liye phirā mujh ko

mujhe talāsh thī jis kī na mil sakā mujh ko

maiñ us ke baare meñ kuchh us se pūchhtā lekin

milā vo jab kabhī bikhrā huā milā mujh ko

maiñ āñdhiy.oñ se laḌūñgā ye maiñ ne sochā thā

havā kā ek hī jhoñkā bujhā gayā mujh ko

mirī vafā kā use bhī hai kis qadar ehsās

vo kitne dukh se ye kahtā hai bhuul jā mujh ko

kaTī hai karb-o-balā meñ tamām 'umr mirī

hayāt lagtī hai maidān-e-karbalā mujh ko

jatan karo mujhe vāpas zamīñ pe laane kā

na aisā ho ki nigal jaa.e ye ḳhalā mujh ko

maiñ apne aap meñ khoyā huā thā ai 'ābid'

kahāñ-kahāñ vo magar DhūñDhtā phirā mujh ko

nagar-nagar dil-e-muztar liye phira mujh ko

mujhe talash thi jis ki na mil saka mujh ko

main us ke bare mein kuchh us se puchhta lekin

mila wo jab kabhi bikhra hua mila mujh ko

main aandhiyon se laDunga ye main ne socha tha

hawa ka ek hi jhonka bujha gaya mujh ko

meri wafa ka use bhi hai kis qadar ehsas

wo kitne dukh se ye kahta hai bhul ja mujh ko

kaTi hai karb-o-bala mein tamam 'umr meri

hayat lagti hai maidan-e-karbala mujh ko

jatan karo mujhe wapas zamin pe lane ka

na aisa ho ki nigal jae ye KHala mujh ko

main apne aap mein khoya hua tha ai 'abid'

kahan-kahan wo magar DhunDhta phira mujh ko