naghma-e-dil ka naya andaz hona chahiye

naġhma-e-dil kā nayā andāz honā chāhiye

saarā aalam gosh-bar-āvāz honā chāhiye

husn ko husn-e-sarāpā naaz honā chāhiye

aam jalvoñ se bahut mumtāz honā chāhiye

ek hī manzar se uktā jā.eñge ahl-e-nazar

zindagī ko inqalāb-andāz honā chāhiye

chashm-e-nazzāra-talab ye be-hisī achchhī nahīñ

imtiyāz-e-jalva-gāh-e-nāz honā chāhiye

naġhma-e-kaif-āfrīñ bhī ruuh kā paiġhām bhī

saaz meñ sab kuchh hai lekin saaz honā chāhiye

kis ko jur.at hai ki Thukrā de qafas vāloñ kī baat

haañ magar ham sab ko ik āvāz honā chāhiye

vaqt aane par qafas ko le uḌe gulshan kī samt

'bismil' aisā jazba-e-parvāz honā chāhiye

naghma-e-dil ka naya andaz hona chahiye

sara aalam gosh-bar-awaz hona chahiye

husn ko husn-e-sarapa naz hona chahiye

aam jalwon se bahut mumtaz hona chahiye

ek hi manzar se ukta jaenge ahl-e-nazar

zindagi ko inqalab-andaz hona chahiye

chashm-e-nazzara-talab ye be-hisi achchhi nahin

imtiyaz-e-jalwa-gah-e-naz hona chahiye

naghma-e-kaif-afrin bhi ruh ka paigham bhi

saz mein sab kuchh hai lekin saz hona chahiye

kis ko jurat hai ki Thukra de qafas walon ki baat

han magar hum sab ko ek aawaz hona chahiye

waqt aane par qafas ko le uDe gulshan ki samt

'bismil' aisa jazba-e-parwaz hona chahiye