نغمۂ زنجیر ہے اور شہر یاراں ان دنوں

نغمۂ زنجیر ہے اور شہر یاراں ان دنوں

ہے بہت اہل جنوں شور بہاراں ان دنوں

اس وفا دشمن سے پیمان وفا ہے استوار

زیر سنگ سخت ہے پھر دست یاراں ان دنوں

محتسب بھی حلقۂ رنداں کا ہے امیدوار

کم نہ ہو جائے وقار میگساراں ان دنوں

تیزیٔ تیغ ادا کی شہرتیں ہیں دور دور

ہے بہت آباد کوئے دل فگاراں ان دنوں

دوستو پیراہن جاں خون دل سے سرخ تر

بڑھ گیا ہے التفات گل عذاراں ان دنوں

اہل دل پر بارش لطف نگاہ دلنواز

مہرباں ہے عشق پر چشم نگاراں ان دنوں

ہے گدائے مے کدہ کے سر پہ تاج خسروی

کوزہ گر کی گل ہے خاک شہر یاراں ان دنوں

کیا عجب عشرت کدوں پر بجلیاں گرنے لگیں

ہے بہت سرکش نگاہ سوگوراں ان دنوں