naghma-e-zist gungunae kaun

naġhma-e-zīst gungunā.e kaun

āgahī kā azaab uThā.e kaun

donoñ raazī to haiñ sulh ke liye

par anā hai ki pahle aa.e kaun

laakh dushman ne mārnā chāhā

jis ko rakkhe ḳhudā miTā.e kaun

jī meñ aatā hai us se baat kareñ

baat apnī magar banā.e kaun

us ne va.ade to be-shumār kiye

apne va.ade magar nibhā.e kaun

dil kī bastī meñ koī kyā aa.e

ye jo ujḌe to phir basā.e kaun

aañkh meñ kirchiyāñ haiñ pahle hī

ḳhvāb ab ke na.e sajā.e kaun

jo kisī kī duā meñ shāmil ho

haath us ke liye uThā.e kaun

jab ta.alluq hī tark kar baiThe

kaun rūThā kare manā.e kaun

jo hue haiñ judā irāde se

aise bichhḌoñ ko phir milā.e kaun

'tāhira' an-kahī hī rahne do

dil kī bāteñ tumhārī paa.e kaun

naghma-e-zist gungunae kaun

aagahi ka azab uThae kaun

donon raazi to hain sulh ke liye

par ana hai ki pahle aae kaun

lakh dushman ne marna chaha

jis ko rakkhe KHuda miTae kaun

ji mein aata hai us se baat karen

baat apni magar banae kaun

us ne wade to be-shumar kiye

apne wade magar nibhae kaun

dil ki basti mein koi kya aae

ye jo ujDe to phir basae kaun

aankh mein kirchiyan hain pahle hi

KHwab ab ke nae sajae kaun

jo kisi ki dua mein shamil ho

hath us ke liye uThae kaun

jab talluq hi tark kar baiThe

kaun ruTha kare manae kaun

jo hue hain juda irade se

aise bichhDon ko phir milae kaun

'tahira' an-kahi hi rahne do

dil ki baaten tumhaari pae kaun