naghmagi se sukut behtar tha

naġhmagī se sukūt behtar thā

maiñ thā aur ik kirā.e kā ghar thā

koī mujh sā na dūsrā aayā

yuuñ to har shaḳhs mujh se behtar thā

har-taraf qaht-e-āb thā lekin

ek tūfān mere andar thā

maiñ banā thā ḳhalīfa-e-daurāñ

yuuñ ki kāñToñ kā taaj sar par thā

maiñ musalsal vahāñ chalā ki jahāñ

do-qadam kā safar bhī dūbhar thā

ghir gayā thā maiñ ik jazīre meñ

aur chāroñ taraf samundar thā

ek ik mauj mujh se Takrā.ī

jurm ye thā ki maiñ shanāvar thā

vahshatoñ meñ balā kā thā phailāv

dasht aur ghar kā ek manzar thā

ek dīvār darmiyān rahī

varna donoñ kā ek hī ghar thā

naghmagi se sukut behtar tha

main tha aur ek kirae ka ghar tha

koi mujh sa na dusra aaya

yun to har shaKHs mujh se behtar tha

har-taraf qaht-e-ab tha lekin

ek tufan mere andar tha

main bana tha KHalifa-e-dauran

yun ki kanTon ka taj sar par tha

main musalsal wahan chala ki jahan

do-qadam ka safar bhi dubhar tha

ghir gaya tha main ek jazire mein

aur chaaron taraf samundar tha

ek ek mauj mujh se Takrai

jurm ye tha ki main shanawar tha

wahshaton mein bala ka tha phailaw

dasht aur ghar ka ek manzar tha

ek diwar darmiyan rahi

warna donon ka ek hi ghar tha