نغمگی شہر کی جنگل کا فسوں بھی غائب

نغمگی شہر کی جنگل کا فسوں بھی غائب

جتنی رفتار بڑھی اتنا سکوں بھی غائب

اسپ ادراک مرا مجھ کو کہاں لے آیا

خوش خیالی بھی دھواں جذب جنوں بھی غائب

اور اب لے گیا آ کر وہ شعور و احساس

دولت خواب تو تھی پہلے سے یوں بھی غائب

برف اب کے یہ جمی کیسی رگوں میں اپنی

جسم کی آگ بھی گم سوز دروں بھی غائب

کشت جاں سوختہ ویراں ہے دیار دل بھی

یعنی مجھ سے وہ مرا حال زبوں بھی غائب

زندگی لائی کہاں ہم کو بتاؤ جاویدؔ

آنکھ حیرت سے تہی دل سے ہے خوں بھی غائب