naghmagi shahr ki jangal ka fusun bhi ghaeb

naġhmagī shahr kī jangal kā fusūñ bhī ġhā.eb

jitnī raftār baḌhī utnā sukūñ bhī ġhā.eb

asp-e-idrāk mirā mujh ko kahāñ le aaya

ḳhush-ḳhayālī bhī dhuāñ jazb-e-junūñ bhī ġhā.eb

aur ab le gayā aa kar vo shu.ūr-o-ehsās

daulat-e-ḳhvāb to thī pahle se yuuñ bhī ġhā.eb

barf ab ke ye jamī kaisī ragoñ meñ apnī

jism kī aag bhī gum soz-e-darūñ bhī ġhā.eb

kisht-e-jāñ soḳhta vīrāñ hai dayār-e-dil bhī

ya.anī mujh se vo mirā hāl-e-zabūñ bhī ġhā.eb

zindagī laa.ī kahāñ ham ko batāo 'jāved'

aañkh hairat se tahī dil se hai ḳhuuñ bhī ġhā.eb

naghmagi shahr ki jangal ka fusun bhi ghaeb

jitni raftar baDhi utna sukun bhi ghaeb

asp-e-idrak mera mujh ko kahan le aaya

KHush-KHayali bhi dhuan jazb-e-junun bhi ghaeb

aur ab le gaya aa kar wo shuur-o-ehsas

daulat-e-KHwab to thi pahle se yun bhi ghaeb

barf ab ke ye jami kaisi ragon mein apni

jism ki aag bhi gum soz-e-darun bhi ghaeb

kisht-e-jaan soKHta viran hai dayar-e-dil bhi

yani mujh se wo mera haal-e-zabun bhi ghaeb

zindagi lai kahan hum ko batao 'jawed'

aankh hairat se tahi dil se hai KHun bhi ghaeb