naghme KHwabida hain nalon ka asar tak chup hai

naġhme ḳhvābīda haiñ nāloñ kā asar tak chup hai

aap kyā chup haiñ fazā hadd-e-nazar tak chup hai

shaam tak mai-kadā gulzār-e-sahar tak chup hai

zindagī vaqt kī tajdīd-e-safar tak chup hai

saath the aap to manzil bhī sadā detī thī

ab ye aalam hai ki har rāhguzar tak chup hai

kis ko āvāz deñ is bolte sannāTe meñ

jis taraf dekhiye dīvār se dar tak chup hai

aañkh darkār hai jazboñ ko samajhne ke liye

chehra kyā kah sake jab dīda-e-tar tak chup hai

be-shu.ūroñ ne uThā rakkhī hai duniyā sar par

hosh-mandoñ kī zabāñ kyā hai nazar tak chup hai

kis se pūchhūñ ki nasheman mirā kis ne phūñkā

bū-e-gul bād-e-sabā shāḳh-e-shajar tak chup hai

dil hai ḳhāmosh to ḳhāmosh hai duniyā saarī

ek aalam hai idhar se jo udhar tak chup hai

'shauq' zindān-e-jahāñ manzil-e-fariyād nahīñ

is ḳharābe meñ to sāñsoñ kā safar tak chup hai

naghme KHwabida hain nalon ka asar tak chup hai

aap kya chup hain faza hadd-e-nazar tak chup hai

sham tak mai-kada gulzar-e-sahar tak chup hai

zindagi waqt ki tajdid-e-safar tak chup hai

sath the aap to manzil bhi sada deti thi

ab ye aalam hai ki har rahguzar tak chup hai

kis ko aawaz den is bolte sannaTe mein

jis taraf dekhiye diwar se dar tak chup hai

aankh darkar hai jazbon ko samajhne ke liye

chehra kya kah sake jab dida-e-tar tak chup hai

be-shuuron ne uTha rakkhi hai duniya sar par

hosh-mandon ki zaban kya hai nazar tak chup hai

kis se puchhun ki nasheman mera kis ne phunka

bu-e-gul baad-e-saba shaKH-e-shajar tak chup hai

dil hai KHamosh to KHamosh hai duniya sari

ek aalam hai idhar se jo udhar tak chup hai

'shauq' zindan-e-jahan manzil-e-fariyaad nahin

is KHarabe mein to sanson ka safar tak chup hai