nagri nagri ghum ke dekha hum ko lage anjaane log

nagrī nagrī ghuum ke dekhā ham ko lage anjāne log

apnī apnī sab ko paḌī hai dard se haiñ begāne log

kaise kaise gul haiñ khilā.e ahl-e-ḳhirad kī hikmat ne

kaun sunegā baat hamārī ham Thahre dīvāne log

aag lagānā khel thā jin kā dard ke lāla-zāroñ meñ

sho.ala-e-sozāñ se larzāñ haiñ aaj vahī farzāne log

kis kī tamanna kaun se armāñ kis kā tasavvur kaun se ḳhvāb

paas thā jo bhī kho kar lauTe nikle the kuchh paane log

maare maare phirte rahe ham haal na pūchhā ek ne bhī

ḳhvāb haiñ sab ke bikhre bikhre bhuul chuke afsāne log

nagri nagri ghum ke dekha hum ko lage anjaane log

apni apni sab ko paDi hai dard se hain begane log

kaise kaise gul hain khilae ahl-e-KHirad ki hikmat ne

kaun sunega baat hamari hum Thahre diwane log

aag lagana khel tha jin ka dard ke lala-zaron mein

shoala-e-sozan se larzan hain aaj wahi farzane log

kis ki tamanna kaun se arman kis ka tasawwur kaun se KHwab

pas tha jo bhi kho kar lauTe nikle the kuchh pane log

mare mare phirte rahe hum haal na puchha ek ne bhi

KHwab hain sab ke bikhre bikhre bhul chuke afsane log