nagri nagri ghum rahe hain ulfat ke diwane chand

nagrī nagrī ghuum rahe haiñ ulfat ke dīvāne chand

paañv shikasta tan zaḳhmī haiñ hāthoñ meñ paimāne chand

jiitī dhuup sisaktī aaheñ jehd-e-musalsal zaḳhm-e-dil

haa.e re us mazdūr kī hālat jis kī qismat daane chand

aisā kaal na dekhā ham ne vaise dekhe kaal bahut

maiḳhāne meñ sab hī pyāse lekin haiñ paimāne chand

ham se ruuTh ke jaane vaale apnā tasavvur rahne de

ham ne bune haiñ jīvan bhar meñ ḳhvāb ke tāne-bāne chand

haañ ai chāragaro merī barbādī kā sāmān karo

ḳhūn-e-tamannā kī surḳhī se saj jaa.eñ kāshāne chand

ġham kī tapish ne bahte aañsū ḳhushk kiye haiñ ai 'anjum'

girya-e-shabnam gulshan gulshan phir bhī bhareñ paimāne chand

nagri nagri ghum rahe hain ulfat ke diwane chand

panw shikasta tan zaKHmi hain hathon mein paimane chand

jiti dhup sisakti aahen jehd-e-musalsal zaKHm-e-dil

hae re us mazdur ki haalat jis ki qismat dane chand

aisa kal na dekha hum ne waise dekhe kal bahut

maiKHane mein sab hi pyase lekin hain paimane chand

hum se ruTh ke jaane wale apna tasawwur rahne de

hum ne bune hain jiwan bhar mein KHwab ke tane-bane chand

han ai chaaragaro meri barbaadi ka saman karo

KHun-e-tamanna ki surKHi se saj jaen kashane chand

gham ki tapish ne bahte aansu KHushk kiye hain ai 'anjum'

girya-e-shabnam gulshan gulshan phir bhi bharen paimane chand