nahif-o-zar-e-sada thak ke baiTh jati hai

nahīf-o-zār-e-sadā thak ke baiTh jaatī hai

sar-e-zabāñ hī du'ā thak ke baiTh jaatī hai

bahut kaThin hai azīzo hamārī ham-safarī

hamāre saath havā thak ke baiTh jaatī hai

na itnā raḳht-e-safar deñ samundaroñ se kaho

miyān-e-rāh ghaTā thak ke baiTh jaatī hai

har ek baar ubhartā hai āftāb-e-vafā

har ek baar jafā thak ke baiTh jaatī hai

yahīñ kahīñ pe ghane zindagī ke saa.e haiñ

yahīñ kahīñ pe qazā thak ke baiTh jaatī hai

vahāñ se hotā hai jaarī ḳhamoshiyoñ kā safar

jahāñ pahuñch ke sadā thak ke baiTh jaatī hai

guloñ se kah do abhī vaqt hai abhī hañs leñ

sahar ke baa'd sabā thak ke baiTh jaatī hai

bahut hī tez hai 'kāzim' hayāt kī raftār

ye aur baat zarā thak ke baiTh jaatī hai

nahif-o-zar-e-sada thak ke baiTh jati hai

sar-e-zaban hi du'a thak ke baiTh jati hai

bahut kaThin hai azizo hamari ham-safari

hamare sath hawa thak ke baiTh jati hai

na itna raKHt-e-safar den samundaron se kaho

miyan-e-rah ghaTa thak ke baiTh jati hai

har ek bar ubharta hai aaftab-e-wafa

har ek bar jafa thak ke baiTh jati hai

yahin kahin pe ghane zindagi ke sae hain

yahin kahin pe qaza thak ke baiTh jati hai

wahan se hota hai jari KHamoshiyon ka safar

jahan pahunch ke sada thak ke baiTh jati hai

gulon se kah do abhi waqt hai abhi hans len

sahar ke ba'd saba thak ke baiTh jati hai

bahut hi tez hai 'kazim' hayat ki raftar

ye aur baat zara thak ke baiTh jati hai