nahin aasan ai beTa koi insan kaamil ho

nahīñ āsān ai beTā koī insān kāmil ho

paḌhā likkhā bahut kuchh phir bhī tum jāhil ke jāhil ho

koī aisā bhī jorū kī taraf se nauj ġhāfil ho

ye kaise tum paḌhe likkhe ho beTā kaise aaqil ho

buā miTTī hai ghar meñ sone chāñdī kī agar sil ho

mazā to zindagī kā jab hai kuchh daulat ho kuchh dil ho

bhalā chāval bhī aisī koī ne.amat thī na detī maiñ

mirī bhittī meñ kaam aa.e buā ghar meñ jo ik til ho

vahī hai dushman ai baajī jo achchhe vaqt meñ lipTe

vahī hai dost ai baajī musībat meñ jo shāmil ho

nikal to aa.ī ho bāhar mahal se chhup chhupā kar tum

kisī kī aañkh paḌ jaa.e to begam kaisī mushkil ho

nivāle ke liye kuttā bhī ghar ghar ghuum phir aaya

paḌe ho haDDiyāñ Daale ajī tum kaise kāhil ho

mire hisse meñ kaise saut kī taqdīr aa jaa.e

tumhāre kaam kī vo hai miyāñ tum us ke qābil ho

isī kā naam duniyā hai koī ujḌe base koī

kahīñ mahloñ meñ mātam ho kahīñ ghūre pe mahfil ho

falak par kis tarah sīḌhī lagā kar koī chaḌh jaa.e

jahāñ dekho farishte kī tarah tum sar pe nāzil ho

na Daale bojh beTī kā ḳhudā duniyā meñ dushman par

pahāḌ ik sar pe rakkhā ho buā chhātī pe ik sil ho

kiye kī laaj mujh ko hai kiye kī sharm tum ko hai

isī kī maiñ bhī qaa.il huuñ isī ke tum bhī qaa.il ho

ubhāreñ aurteñ tum ko dabā.eñ aurteñ tum ko

garebānoñ meñ muñh Daalo muo tum ab to qaa.il ho

buḌhautī meñ javānī kī kahānī se phaT paḌeñ nīñdeñ

kaḌī hai dhuup sar par aañkh kholo kaise ġhāfil ho

kahānī tum ne gehūñ kī jo dastarḳhvān par chheḌī

sabhoñ ko ho gayā dhokā ki tum bhī koī kāmil ho

tumhārī reḳhtī meñ sahl ho jaatā hai sab aakar

koī mazmūn ai 'shaidā' jo mushkil se bhī mushkil ho

nahin aasan ai beTa koi insan kaamil ho

paDha likkha bahut kuchh phir bhi tum jahil ke jahil ho

koi aisa bhi joru ki taraf se nauj ghafil ho

ye kaise tum paDhe likkhe ho beTa kaise aaqil ho

bua miTTi hai ghar mein sone chandi ki agar sil ho

maza to zindagi ka jab hai kuchh daulat ho kuchh dil ho

bhala chawal bhi aisi koi neamat thi na deti main

meri bhitti mein kaam aae bua ghar mein jo ek til ho

wahi hai dushman ai baji jo achchhe waqt mein lipTe

wahi hai dost ai baji musibat mein jo shamil ho

nikal to aai ho bahar mahal se chhup chhupa kar tum

kisi ki aankh paD jae to begam kaisi mushkil ho

niwale ke liye kutta bhi ghar ghar ghum phir aaya

paDe ho haDDiyan Dale aji tum kaise kahil ho

mere hisse mein kaise saut ki taqdir aa jae

tumhaare kaam ki wo hai miyan tum us ke qabil ho

isi ka nam duniya hai koi ujDe base koi

kahin mahlon mein matam ho kahin ghure pe mahfil ho

falak par kis tarah siDhi laga kar koi chaDh jae

jahan dekho farishte ki tarah tum sar pe nazil ho

na Dale bojh beTi ka KHuda duniya mein dushman par

pahaD ek sar pe rakkha ho bua chhati pe ek sil ho

kiye ki laj mujh ko hai kiye ki sharm tum ko hai

isi ki main bhi qail hun isi ke tum bhi qail ho

ubhaaren aurten tum ko dabaen aurten tum ko

garebanon mein munh Dalo muo tum ab to qail ho

buDhauti mein jawani ki kahani se phaT paDen ninden

kaDi hai dhup sar par aankh kholo kaise ghafil ho

kahani tum ne gehun ki jo dastarKHwan par chheDi

sabhon ko ho gaya dhoka ki tum bhi koi kaamil ho

tumhaari reKHti mein sahl ho jata hai sab aakar

koi mazmun ai 'shaida' jo mushkil se bhi mushkil ho